Carito Ambo: Rafdi. S
Ambo jarang bisa salut ka urang. Apolagi ka urang urang nan adoh udang di balik batu.
Sabana anti ambo ka tipe tipe urang takah iko. Awak ko baginyo hanyo bantuak mandorong oto mogok.
Baitu oto e iduik. Baitu inyo duduak. Baitu inyo dapek kurisi, nan awak ko, ijankan ka inyo sapo, baitu mancaliak ka awak, inyo malengah.
Pura pura lupo. Pura pura indak tahu. Kok ka basalam awak Jo inyo, bisa bisa tangan awak di kalatik an nyo.
Tapi lain carito, kok lah dakek dakek maso urang ka pemilu, awak nyo cari tu.
Nan inyo mandadak jadi urang elok laku.
E...yayai !
Begana begini caritonyo. Janjinyo baserak serak bantuak sarok di tangah kota nan indak takamehan dek Pak Wali e...
Awak nyo agiah harapan. Dari Utara sampai ka selatan. Dari Barat sampai ka Timur, isi kecek e buah janji .
Tapi, kalau buah tu masak, apo nan tajadi?
Hampo. Hampo ka sadonyo dunsanak!
Kepercayaan ambo ka urang urang nan bakurisi kekuasaan tu hampiang lanyok sadonyo.
" Eloknyo tu, malakik dapek se tu nyo. Indak ciek juo tu doh.... Inyo duduak, nan awak inyo lupokannyo tu", pandapek model ko, lah hampiang saragam tatanam di kapalo sebagian besar masyarakaik kito.
Terus terang, kepercayaan ambo nyaris hilang...sanak.
Sapakan nan lalu, ambo batamu jo babarapo urang guru guru.
Guru guru tu sadang manyabuik salah satu namo . Guru guru ko, guru guru nan maaja di SD jo di TK PAUD.
Inyo sabuik namo tokoh tu. Ambo menyimak taruih.
" Cubolah kalau anggota DPRD wak ko kepeduliannyo ka guru guru jo ka dunia pendidikan takah apak tu. Pasti maju dunia pendidikan awak tu", kecek salah surang ibuk nan kamek tu sambia manikmati mie padeh di dingginnyo hawo nagari Kayu Aro.
" Iyo. Awak danga di DPRD, apak tu selalu bicara dan mandasak Pemerintah Propinsi untuk maningkek an gaji guru honorer! Salut wak jo liau ...", kecek guru nan lain manyolo.
Indak sakali duo kali ambo mandanga namo apak tu disabuik sabuik di tangah nagari doh sanak. Acok bana ko ha....
" Urangnyo randah hati. Elok. Paduli Jo urang banyak. Inyo indak ongeh. Indak poak...", Iko ambo danga di tangah balai.
Namo apak tu juo disabuik sabuiknyo baru.
" Apak tu paduli ka dunia tani. Kalau pupuk maha dan susah dicari, apak tu heboh tu ...Sebagai anggota DPRD, suaronyo lantang manyuarokan kesulitan para petani ! " kecek surang patani pulo nan ambo danga di Lapau kopi dakek persawahan.
" Liau dek kami alah takah apak angkek mah. Liau paduli ka dunia seni tradisi. Tautamo ka pengembangan silek jo randai", kato salah surang anak mudo pegiat seni tradisi randai nan sanggarnyo dibina dek apak tu.
Dek panasaran, ambo cari wakatu untuak batamu jo apak tu bana.
Ambo cari na baliau ka kantuanyo di DPRD Sumbar. Ambo cari ka ruang anggota dewan. Sabalunnyo tantu ambo minta permisi dulu jo patugeh di situ.
Sabalunnyo, ambo hanyo sekedar kenal namo jo apak tu.
Apolagi baliau pernah manjadi Ketua DPRD Solok dulunyo.
Namo baliau, memang acok jadi perbincangan masyarakaik.
Mulai dari eloknyo. Santunnyo. Randah hatinyo...sampai soal kesungguhannyo mambantu urang susah.
Kecek urang, liau kalau mambantu urang tu sampai sampai...Sampai salasai urusan urang banyak diurusnyo.
Karajonyo karajo nyato. Bukan karajo duto duto.
Inyo memang suko manolong urang banyak!
Kato kato takah tu Acok bana ambo danga.
Ondeh, tanyato sambutan baliau hangek. Akrab. Padohal baru sakali ambo batamu jo apak ko.
Nan mambuek ambo terkesan adolah kemampuan dirinyo nan manyimak apo nan awak sampaikan.
Inyo mandanga se. Indak namuah manyolo nyolo !
Nyo danga elok elok apo nan ambo caritoan. Nyo simak penuh perhatian.
Ambo hanyo seorang mahasiswa nan sadang mangarajoan skiripsi. Padohal ambo tahu, baliau seorang doktor.
Nan mambuek ambo terkesan soal kerendahan hatinyo.
Sudah tu nan mambuek ambo salut , katikok visinyo sebagai anggota DPRD tu jaleh jo tarang.
Jaleh visinyo untuk membangun nagari. Jaleh visinyo, ba a kok berpihak ka pembangunan pendidikan .
" Dinda, Propinsi Wak ko sabananyo kayo jo Sumber Daya Alam. Lawik cukup luas. Panorama wak cukup indah alamnya. Lahan pertanian awak cukup potensial. Untuk memberdayakan segala potensi alam, kita harus membangun kecerdasan dan keterampilan anak negeri. Soal kemiskinan itu erat hubungannya dengan pendidikan", kato apak tu di ujung pertemuan kami .
Apak tu diam. Mamandang ka ambo. " Dinda harus serius dan sungguh sungguh kuliah. Bukankah, tak ada orang cerdas yang terampil yang menganggur", kato apak tu nan banamo DR Hardinalis Kobal anggota DPRD SUMBAR dari Golkar !
Baitulah sanak. Tanyato masih adoh politisi di Sumbar ko nan iyo bana bana bakarajo untuak rakyaik badarai.
Salah satunyo, apak tu .
Pak Kobal nan namonyo Iyo bana tasabuik di Solok Raya....
Awak harus sportif sanak. Kalau adoh urang elok dan bakarajo nyato...harus awak apresiasi...
Jan mancacek se taruih. Mamuji urang elok, bukan lah sebuah dosa.
Mudah mudahan Pak Kobal taruih sumangaik manyuarokan derita rakyat marasai....dan sabana manjadi panyambuang lidah bagi rakyaik badarai...
Padang 16 Juni 2023.
