Sajak manang pamilihan nan kapatang, Kuwaih Sauk sibuk ka notaris.
Inyo maurus berbagai akte pendirian usaho.
Dari PT sampai ka yayasan hinggo ka bantuak LSM bagai.
PT e, banyak bidang. Sagalo adoh. Sampai PT katering gai adoh dek e.
Batanyo kamanakan e, Uwa Kantang.
" Untuak a sabanyak tu bana PT amak dirikan! "
" Dek wa ang a nan ka jaleh. Alun main ang lai ko doh... Wa ang, nan wa ang pikia an rokok jo kopi se baru... Aden banyak nan ka den kamehan! "
" Apo nan amak kamehan. Amak lah manang, mah... "
" Ha tu nyo. Wa ang sangko manang ko sanang. Lai jaleh dek wa ang, baban ko mah! "
" Baban ba a pulo? Gadang gaji mak nantik mah! "
" Ha tu nyo.... Wa ang sangko, manang den ko manang perai? "
Uwa Kantang tamanuang.
" Lah abih tandeh aden mah dang. Untuang den manang. Kalau indak? Sakik utak den. Jo apo ka den bayia utang sabalik pinggang tu! "
" Iyo... Tahu den. Tapi untuak apo gunonyo dek Amak mauruih perusahaan sabanyak tu bana? ".
" Wa ang indak adoh ka nan jaleh ciek juo dek ang doh. Iko guno e untuak bajago jago" , jawek Kuwaih Sauk manunjuak ka tumpukan akte notaris nan balapih lapih.
" PT nan ciek ko Dirutnyo Ujang Cicai "
" Ujang Cicai? "
"Iyo... Ba a tu? "
" Paja tu panduto Mak. Marasai nyo kicuah e Mak bekoh? "
" Aden katakicuah? Rasio e di tangan den! "
"Rasio? "
" Iyo... " Kuwaih mahangguak.
" Inyo marangkak i bini Itai Ladiang tangah hari tagak... Hanyo aden nan tau... Macam macam inyo, den bukak rasio e ka Itai...bia ndak nyo kampak batang hilia e dek si Tai".
Si Mamak bajalan ka arah pintu jandela rumah gadang nan lah mulai katirisan tu.
" Cicai siap mati untuak Den! Nyampang kok tajadi apo apo di perusahaan ko nantik, inyo indak ka pernah malibatkan aden. Muncuang e lah den tutuik jo rasio... "
Sudah Uwa Kantang batanyo sambia manunjuak ka sebuah akte PT.
" Iko, parusahaan nan iko manga lo si Daih Dongok nan Mak jadikan direkturnyo ? "
" Wa ang, ma nan ka jaleh dek ang. Jaleh si Daih ko anak pisang awak mah..."
" Batua inyo anak pisang awak, tapi inyo bodoh... "
" Ha tu nyo... Jawabannyo, dek inyo bodoh tu lah! "
Uwa Kantang sudah tu manunjuak ciek lai akte perusahaan nan talatak di meja papan baaleh kaco nan lah ratak.
" Iko, manga lo Da Apuak Dangawa ko nan jadi Dirut!"
" Wa ang, ma nan ka jaleh dek ang... si Apuak ko jaleh konco den sajak es em a, ko... "
" A...lah, paja ko, kawan nan amak sanjuang sanjuang tu pengkhianat mah "
" Wa ang picayo se lah jo mamak ang ko. Si Apuak ko, rasio e adoh pulo di tangan den", mandanga kecek mamak e, tadiam kamanakannyo ko...
"Lai tahu dek ang ndak, inyo mandapek an bini e tu dek aden kawanan inyo dulu ka dukun . Bini e tu kanai guno guno dek e tu... ".
" Ooo, patuiklah namuah Ni Raih jo Uda Apuak... ".
Maangguak angguak surang kamanakan Kuwaih ko.
" Indak imbang barang ko Doh...Da Apuak... ", taputuih kato kato e..." Maaf Mak...Bukan den mancacek kawan Amak tu... Da Puak ko capuak ranyam.... ".
Sudah tu si kamanakan mausulkan saran.
" Mak... Sebagai kamanakan den basaran. Rancak mak pakai se perusahaan urang lai. Cukuik mak bayia se komisi proyek e... Salasai tu mah! ".
" Salasai Iyo salasai. Tapi, sudah tu mamak ang ko masuak panjaro kalau proyek e tu bamasalah..! "
" Ba a tu Mak? "
"Nan punyo perusahaan tu pasti akan mambukak rasio juo... Ma namuah inyo kanai surang. Lah banyak contoh mah... Awak ko harus baraja ka nan manang, man contoh ka nan sudah... Lai paham ang tu? ".
" Jadi, apo visi jo misi amak sajak manang ko? "
" Jan itu lo nan wa ang bahas bahas. Visi misi, barek na carito wa ang mah... "
" Jadi..... "
" Nan jaleh, satahun duo ko, pokok harus pulang dulu. Modal jan sampai tabanam"
Sang mamak mahiruik rokok e dalam dalam.
" Masuak tahun katigo jo ka ampek, itu tahun tahun mancari labo sabanyak banyak antah untuak modal salanjuik e. Sudah tu tahun ka limo tahun si bungsu indak ka baradik lai. Iko namo e, tahun kameh kameh. Tangguak rapek. Tahun manyauk sampai habih! "
Eh, tibo tibo, indak hujan indak paneh, datang galodo gadang.
Nyo hanyuik an sagalo akte perusahaan tu.
Tiang rumah gadang baroyak.
Si kamanakan berhasil bagantuang ka pagu.
Si mamak tagalincia.. Inyo mamakiak mamintak toloang ka kamanakannyo tu.
Tapi, kamanakan e ko gaca baitu mancaliak aia gadang nan mahondoh sagalo nan tampak...
" Toloooong den Kantang.... " Inyo ma himbau imbau namo kamanakan e.
Makin kareh rabik mamak, makin kuaik tangan Kantang mamacik paran pagu.
" Maaf Mak, den indak bisa manolong. Kalau den tolong mamak, baduo duo kito hanyuik jo karam... Sia nan ka manjawek warih ? " Gumam kamanakan.
Bisuaknyo, mamaknyo ditamukan tahimpik di bawah batu gadang.
Antah ba a caritonyo, mayik si mamak ditamukan dalam kondisi indak bahati jo tangkurak nan alah kahilangan isi.
Duo mato e tabudua!
( Cibubur 14 Juni 2024 )
